БИШКЕК, 11-сен. — Sputnik. Токтоп калган троллейбустардын айынан автотыгындар пайда болуп жатканын шаар тургундары Sputnik агенттигине билдирди.
"Түндүкэлектро" ишканасы шаардын борборунда жарык жок экенин тастыктады.
"Түшкү саат 11:40та 35 киловольттук "ТЭЦ Бишкек – Пенько – Жутовая" электр кабели үзүлгөн. Анын кесепетинен "Центральная-4" жогорку чыңалуудагы көмөкчордону өчүп калган. Бишкек шаарынын борбордук бөлүгү жарыксыз калды", — деди "Түндүкэлектрдин" маалымат катчысы Гуля Мураталиева.
Учурда ишкананын жумушчулары башка булактар аркылуу электр энергиясын берүү боюнча аракеттерди көрүп жатканын кошумчалады.
Жакын арада электр жарыгын берүү калыбына келе турганын "Түндүкэлектрдан" билдиришти.
