БИШКЕК, 9-сен. — Sputnik. Саясий партиялар үгүт иштерине короткон акчага өнөкөт бөйрөк оорусу менен жабыркаган 173 кыргызстандыктын бөйрөгүн алмаштыруу үчүн операция жасоого жетмек.
Борбордук шайлоо комиссиясынын маалыматына ылайык, шайлоого катыша турган саясий партиялар үгүт иштери үчүн 400,8 миллион сом (6 миллион долларга жакын) коротту.
"Өнүгүү — Прогресс" партиясы башкаларга салыштырмалуу эң көп каражат сарптап, шайлоо фондунан 89 миллион сом жумшаган. Андан кийинки орунда 60 миллион сом короткон "Республика – Ата-Журт" партиясы, үчүнчү орунда 59 миллион сом жумшаган КСДП келет.
Шайлоого катыша турган 14 саясий партиянын ичинен эң аз "Кыргызстан элдеринин конгресси" короткон. Бул партиянын шайлоо фондуна 5 миллион 200 жүз сом чогулса, анын 5 миллионун үгүт иштерине жумшаган.
14 партиянын шайлоо фондуна жалпысынан 449 миллион сомдой чогулган. Учурда анын 48,2 миллион сому калды.
