БИШКЕК, 2-сен. — Sputnik. Бишкек шаарынын унаа жолдорун оңдоого Кытай мамлекети 350 миллион юань бөлө турганын Экономика министрлиги билдирет.
Президент Алмазбек Атамбаевдин Экинчи дүйнөлүк согуштун аякташынын 70 жылдыгына арналган парадга катышуу үчүн Кытайга болгон иш сапарынын алкагында эки тараптуу кызматташуу программасы кабыл алынган.
Маалыматка ылайык, каражатка жалпы жонунан 100 чакырымды түзгөн 49 жол тилкеси оңдолот.
Буга чейин 2014-жылдын 18-21-май күндөрү КРдин Экономика министрлиги менен КЭР Коммерция министрлигинин ортосунда Бишкек шаарындагы жолдорду оңдоо долбоору үчүн Кытай мамлекети тарабынан кайтарымсыз грант бөлүп берүү боюнча меморандумга кол коюлган.
Учурда Бишкектин Махатма Ганди, Жукеев-Пудовкин, Ауэзов көчөлөрүнүн 7,44 чакырым тилкеси оңдолду. Долбоордун жалпы наркы 52,5 миллион кытай юань болгон.
