Атамбаев: газдан электр энергия алуучу станция куруу боюнча сүйлөшүүлөр жүрүп жатат

КЕМИН, 28-авг. — Sputnik. Газдан электр энергиясын алуу боюнча Бишкекте атайын завод курула турганын президент Алмазбек Атамбаев "Датка-Кемин" жогорку чыңалуудагы электр линиясынын расмий ачылышында билдирди.

Өлкө президенти Кыргызстан электр энергиясын алуунун башка булактарын да караштырышы керектигин баса белгиледи.

"Газдан жана көмүрдөн электр энергиясын өндүрүүгө да өтүш керек. Бишкекте газдан электр энергиясын өндүрүүчү станция куруу боюнча Газпромдун жетекчиси Алексей Миллер менен сүйлөштүм. Ал азыр ойлонуп жатат", — деди ал.

Атамбаев өз сөзүндө Кара-Кече кенине дагы ушундай эле станцияларды куруу керектигин айтты. Эгер мындай станциялар курула турган болсо, иштер үзгүлтүккө учурабай, Токтогул суу сактагычындагы сууга көз карандысыздык жаралбай тургандыгын кошумчалады.

"Датка-Кемин" жогорку чыңалуудагы электр линиясын куруу иштери 2012-жылы башталган. 500 киловольттуу "Датка — Кемин" жогорку чыңалуудагы электр линиясы түштүктөгү "Датка" жана түндүктөгү "Кемин" подстанцияларын туташтырат анын жалпы узундугу 405 чакырымга жетет. Курулуш иштеринин алкагында кошумча 500 мегаватт кубаттуулуктагы автотрансформатор орнотуу жана "Ала-Арча" подстанциясындагы 200 мегаваттык эки автотрансформаторду 220 мегаваттык менен алмаштыруу каралган. 

Долбоордун жалпы суммасы 390 миллионго жакын долларды түзөт.