БИШКЕК, 26-авг. — Sputnik. Оперативдик иш-чаралардын натыйжасында Ош шаардык ички иштер башкармалыгынын кызматкерлери алдамчылык кылып жүргөн Пакистандын 27 жаштагы жаранын кармаган. Бул тууралуу Ош ШИИБдин маалымат кызматы билдирди.
Кармалган жаран мекендештерин Канада, АКШ жана Жаңы Зеландия мамлекеттерине виза жасап берем деп Ош шаарына чакырып, акчасын алган соң, аларды таштап, качып кетип жүргөн. Ал Ош шаарында 17, Бишкек шаарында 12 мекендешинин 260 миң долларын алдап алып, изин жашырып кеткен.
Учурда анын ушул сыяктуу башка иштерге тийиштиги бар-жогу текшерилүүдө. 27 жаштагы пакистандык жаранга карата КРдин Кылмыш жаза кодексинин 166-беренеси боюнча кылмыш иши козголду.
Ош шаардык ички иштер башкармалыгы бул жарандан жабыр тарткандар болсо, башкармалыктын 10-бөлүмүнө кайрылуусун суранат.
