БИШКЕК, 26-авг. — Sputnik. БШК парламенттик шайлоого катыша турган партиялардын тизмесин карап, алгачкы 3-4 партияны ишемби же дүйшөмбү күнү каттоодон расмий өткөрүп, шайлоого катышууга уруксат берет. Бул туурасында БШКнын мүчөсү Жеңиш Акматов Sputnik маалымат сайтына билдирди.
Акматовдун айтымында, БШК партиялардын тизмесин текшерүү боюнча өздөрүнө тиешелүү бөлүгүн бүттү, келерки иш ИИМде калды.
"Биздин милдет квоталарды — аялдар менен майыптардын тизмеде бар-жогун кароо. Аны текшерип койдук, эми партия берген тизмедеги соттолгондорду ИИМ текшерип бериши калды", — деди Акматов.
Тизмелерин алгачкылардан болуп БШКга берген "Ата Мекен", "Бир бол", "Ар-Намыс", "Өнүгүү- прогресс" партияларынын талапкерлери соттолгон-соттолбогонун тастыктаган кагаз келет.
"Тизмелерин биринчи тапшырган партиялардыкы текшерилип, бүгүн-эртең келип калышы керек. Төрт партияны ишемби же дүйшөмбү күнү каттасакпы деп жатабыз", — деди Акматов.
Өлкө башчысы Алмазбек Атамбаевдин жарлыгына ылайык, парламенттик шайлоо ушул жылдын 4-октябрына дайындалган. Расмий үгүт иштери 4-сентябрдан тарта башталат.
