БИШКЕК, 26-авг. — Sputnik. Синьцзян-Уйгур автономиялык районунун Артуш жана Кашкар шаарлары менен кызматташуу Нарын облусунун экономикалык өнүгүшүнө түрткү болорун өкмөттүн облустагы өкүлү Аманбай Кайыпов билдирди.
Эл аралык уюмдардын өкүлдөрү, Россия, Белоруссия, Кытайдан келген ишкерлер, Кыргызстандын ишкер коомчулугу катышкан иш-чара облустун экономикалык өнүгүшү, соода-экономикалык байланышты бекемдөө, социалдык долбоорлорду ишке ашырууга чет элдик жана жергиликтүү инвесторлорду тартуу максатын көздөдү.
Кайыповдун айтымында, аталган облус "Нарын" эркин экономикалык аймагын пайдалануу менен Жибек Жолу аркылуу ЕАЭБ өлкөлөрүнө кетүүчү транзиттик-логистикалык коридордун өнүгүшү боюнча пландарды ишке ашырууга ниеттенип жатканын билдирди.
"Кочкор районунда кытай инвесторлору тарабынан бут кийим өндүрүүчү фабриканын ачылышы ири чет элдик инвестиция болуп саналат. Синьцзян-Уйгур автономиялуу районунун Артуш жана Кашкар шаарлары менен кызматташуу Нарын облусунун экономикалык өнүгүшүнө жана калктын жашоосунун жакшырышына түрткү болот", — деди өкмөттүн өкүлү.
Иш-чара Нарын облусунун жана "Нарын" эркин экономикалык аймагынын Кытай жана Россия ишканалары менен кызматташуусу боюнча меморандумга кол коюу менен аяктады.
