БИШКЕК, 19-авг. — Sputnik. Чычкан капчыгайында өрт өчүрүп жаткан учурда жеңил жаракат алган эки адамга медициналык жардам көрсөтүлдү. Бул туурасында Sputnik маалымат агенттигине Токтогул районун акими Майор Сатымкулов билдирди.
Акимдин айтымында, алар жергиликтүү тургундар.
"Кудайга шүгүр, өтө оор жаракат алгандар катталган жок. Буту-колун чырпыкка тыттырып, ташка тилдирип алгандар, кан басымы көтөрүлүп кеткендер бар. Мен өзүм эки кишинин кайрылганына күбө болдум. Бири отуздардагы жигит, экинчиси кан басымы жогорулап кеткен аксакал болду. Аларга штабдагы "Тез жардам" биринчи жардам көрсөттү", — деди аким Сатымкулов.
Акимдин айтымында, капчыгайда жайгашкан кафелердин, тамактануучу жайлардын ээси өрт өчүрүүчүлөргө жардам көрсөтүшүп, кол кабыш кылышкан.
"Чакан жана кичи бизнестин, жол боюнда жайгашкан кафе, тамактануучу жайлардын ээлерине аким катары ыраазычылык билдирем. Абдан жакшы жардам беришти. Алгач өрт башталганда чатырлар жеткириле электе, серелерге, кафелерге өрт өчүрүүгө келгендерди жаткырып, тамак-аш менен камсыз кылып турушту", — деди райондук акими.
Чычкан капчыгайындагы өрт 2015-жылдын 13-августунда саат 16:17 чамасында Бишкек-Ош унаа жолунун 251-253-чакырымдарында башталган. ӨКМ менен жергиликтүү бийликтин маалыматында ары-бери каттагандарга кооптуулук жараткан жок. Бирок учурда 100 гектарга жакын аймак өрткө кабылды.
