БИШКЕК, 19-авг. — Sputnik. Августтун аягында жайлоодогу бала бакчалар ишин токтотуп, бирок эмдиги жылы кайра иштей баштарын "Жайлоодогу бала бакчалар" долбоорунун координатору Асылбек Жоодонбеков билдирди.
Анын айтымында, 2014-жылы жайлоолордо 35 бала бакча иштеп, ага 800 бала барган. 45 тарбиячынын күчү менен алар мектепке чейинки даярдыктан өтүштү.
"Быйыл жайлоолордо 87 бала бакча ачылып, 78 айыл аймагын камтыды. Жалпы жонунан 2100 бала менен 108 тарбиячы иштеди", — деди Жоодонбеков.
Координатор жай мезгилинде малчылардын балдары сүрөт тартканды, бийлегенди үйрөнүп, чет тилин өздөштүрүүгө аракет жасашканын белгиледи.
"Өзгөчө кырдаалдар министрлиги биринчи жолу жашоо коопсуздугу боюнча мультфильмдерди көрсөтүү менен мастер-класстарды өттү", — дейт долбоордун өкүлү.
Жоодонбеков боз үйлөр жана тарбиячылардын эмгек акысы жергиликтүү бийлик жана жайыт комитеттери тарабынан бөлүнгөнүн кошумчалады. Ал эми тийиштүү окуу куралдары, кеңсе буюмдары, китептер, оюнчуктар менен бала бакчаларды эл аралык "Роза Отунбаеванын демилгеси" коомдук фонду камсыздаган.
