БИШКЕК, 19-авг. — Sputnik. Мамлекеттик каттоо кызматы шейшемби күнү шайлоо процесси боюнча калкты маалымат менен камсыздоо максатында телефондук тейлөө борборун ишке киргизгенин мекеменин маалымат кызматы билдирет.
Телефондук тейлөө борборунан жарандар шайлоого байланыштуу суроолор боюнча маалымат ала алышат.
"Жарандар (0312) 98-61-41 телефону аркылуу шайлоо процесси, керектүү документтер, добуш берүүгө катышуу процедуралары, биометрикалык маалымат тапшыруу пункттары, шайлоочулардын тизмеси тууралуу маалымат ала алышат", — деп айтылат билдирүүдө.
Биометрикалык маалымат чогултуу 19-сентябрда аяктайт. Талапка ылайык, 16 жаштан жогору болгон бардык жарандар бармак издерин, санарип сүрөтүн жана электрондук кол тамгасын тапшырууга милдеттүү. Жалпысынан Кыргызстан боюнча 3 миллион 641 киши жеке маалыматтарын тапшыруусу керек деп болжонууда.
