Дем алыш күндөрү Нарынга иш сапары менен барган премьер-министр Темир Сариев университеттин курулушу менен таанышып чыкты. Университеттин башкы директору Богдан Кравченконун айтымында, окуу жайдын программасы эл аралык стандартка жооп берет. Бул курулуш экономикалык өнүгүүнүн бир бөлүгү катары алыскы аймактарды өнүктүрүүгө кадам болуп саналат.
Өкмөт башчысы жаңы окуу жылына студенттерди кабыл алууга даяр турган университеттин дыкат ойлонулган стратегиялык планы купулуна толгонун белгиледи.
"Сиздер студенттерге сапаттуу билим алууга, келечекте Кыргызстанда эле эмес, дүйнө жүзү боюнча кыйналбай иш менен камсыз болуусуна шарт түзүп жатасыздар. Алысты көрө билген саясат өз жемишин берет деп ишенем", — деди премьер-министр.
Сариев университеттин курулушу Нарын облусунун эле эмес, жалпы Кыргызстандын өнүгүүсүнө салым кошорун белгиледи.
