БИШКЕК, 18-авг. — Sputnik. Бир да экономика инвестициясыз өнүкпөй турганын, Кыргызстан инвесторлор үчүн бардык шарттарды түзүп берүүгө даяр экенин биринчи вице-премьер-министр Тайырбек Сарпашев билдирди.
Өкмөттүн басма сөз кызматынын маалыматына ылайык, Сарпашев Сауд Аравиясынан келген инвесторлорду кабыл алып, Кыргызстандын ЕАЭБге кошулуусу менен инвестициялык мүмкүнчүлүктөрү тууралуу айтып берди.
Сауд Аравиясынан келген инвестор Штай Тамими Хайдер Мусблах Салман инфраструктуралык долбоорлорго жумшала турган каражаттын көлөмү 200 миллион доллардан аша турганын билдирди.
"Соода түйүнү Бишкектин түштүк аймагындагы 25 гектар жерге курула турган болду. Жүргүзүлгөн анализ Бишкекте дүйнөлүк стандартка жооп берген инфраструктуралык объекттин жок экенин көрсөттү. Аталган долбоордун ишке ашышы башкаларга үлгү болуп, Сауд Аравиясынан башка инвесторлорду да тартууга көмөктөшөт", — деди ал.
Сарпашев өз кезегинде Сауд Аравиялык инвесторлорго өкмөт бардык ыңгайлуу шарттарды түзүп берүүгө даяр экенин белгиледи.
