БИШКЕК, 18-авг. — Sputnik. Кыргызстандык өнөрпоздор менен кол өнөрчүлөр Түштүк Кореяда өтө турган "Жибек Жолунун маданий фестивалы" аттуу эл аралык иш-чарага катыша турганын Маданият, маалымат жана туризм министрлигинин өкүлү Ринат Мурзаев кабарлады.
Маалыматка ылайык, эки же үч жылда бир өтө турган фестиваль быйыл Түштүк Кореянын Кенжу шаарында 20-августтан баштап октябрь айына чейин болот.
"Кыргыз делегациясын КРдин маданият министри Алтынбек Максутов жетектейт. Быйыл бул маданий иш-чарага 16 өлкөдөн келген өнөрпоздор катышат. Мындан тышкары, алты мамлекеттин маданият министрлери келери күтүлүүдө", — деди Мурзаев.
Ал бул жылы фестивалды кыргызстандыктар ачарын, 20-27-август күндөрү эл назарына Кыргызстандын маданияты, каада-салты, кол өнөрчүлүгү тартуулана турганын кошумчалады.
"Жибек Жолунун маданий фестивалы" 1998-жылдан бери өткөрүлүп келет. Кылымдарды карыткан тарыхы дар, көрөңгөлүү маданий мураска бай элдердин руханий байлыгын жайылтып, даңазалоону көздөйт.
