БИШКЕК, 8-авг. — Sputnik. Кыргызстан үчүн Эл аралык "Экспо-2017" көргөзмөсүнө катышуу чоң мааниге ээ экенин вице-премьер-министр Валерий Диль аталган көргөзмөгө даярдануу иш-чарасына арналган жыйын учурунда билдирди.
Астана шаарында "Келечектин энергиясы" деген ураандын алдында өтө турган эл аралык "Экспо-2017" көргөзмөсү эки жылдан кийин 10-июнунан баштап 10-июлга чейин болот.
"Кыргыз павильонун мамлекеттин гидроэнергетикалык мүмкүнчүлүгүнө жана энергия булактарынын жаңыртылышына басым жасоо менен даярдоо зарыл. Бул потенциал туура пайдаланууда бүтүндөй Борбордук Азиянын муктаждыгын канааттандырууга жетет", — деди чиновник.
Вице-премьердин айтымында, Астанада өтө турган көргөзмө бардык континенттерден келген ишкерлердин башын бириктирет.
"Көргөзмөгө катышуу Казакстандын ишкерлери менен байланыш түзүүгө мүмкүнчүлүк берет. Дал ушул ири иш-чарада чек арадагы сууларды өз ара пайдалуу колдонуунун келечегин талкуулоого шарт түзүлөт", — деди Диль.
Эл аралык "Экспо" көргөзмөсү 2017-жылы Астана шаарында өтө турганы мындан төрт жыл мурун, 2011-жылы Эл аралык көргөзмөлөр бюросунун штаб-квартирасында белгилүү болгон. Анда Казакстан жашыруун добуш берүүнүн натыйжасында көргөзмө өткөрүүгө дагы бир талапкер Бельгиядан озуп чыккан.
Быйыл бул көргөзмө Италиянын Милан шаарында өтүп, эстафетаны Түркиянын Анталия шаарына өткөрүп берди.
