БИШКЕК, 4-авг. — Sputnik. Бишкектин мэри Кубанычбек Кулматов шахмат боюнча шаарлар арасында өткөрүлгөн Азия чемпионатына катышып келген курама команда менен жолукканын мэриянын маалымат кызматы билдирет.
Чемпионат 21-29-июлда Шри-Ланканын Васкадува шаарында өткөн. Мелдеш швейцария системасы менен тогуз турда өтүп, ага 16 команда катышкан. Натыйжада бишкектик шахматчылар тогуз оюн өткөрүп, анын жетөөндө жеңишке жетишкен. Бишкектиктер мелдештен бир алтын, эки коло медаль тагынып келишти.
Кулматов шахматчыларды ийгиликтери менен куттуктады.
"Биз спорттун бул түрүнө шаардыктарды парктарда, үй короолорунда ойнотуп, алардын жалпы кызыгуусун жарата алабыз. Мындан тышкары, мектептерде жалпы билим берүү программасына шахмат боюнча факультатив киргизилсе пайдалуу болмок", — деди шаар башчысы.
Алтын медалды Мелис Маматов, коло медалды Чыңгыз Исаев менен Тагир Таалайбеков утуп алган.
Шахматчылар спорттун бул түрү кеңири жайылышына кам көрүшө турганын билдиришти.
