БИШКЕК, 1-авг. — Sputnik. Мекеменин атайын эсебине түшпөй калган 7,5 миллион сомго жакын каражат "жел" акча болуп эсептелерин республиканын Саламаттык сактоо министрилигинин алдындагы Улуттук онкология борборунун директору Бактыгүл Султангазиева.
Жетекчинин айтымында, прокурордук текшерүү бейтаптар борборго келип түшкөндөгү эсептик эреже бузууларды аныктаган, бирок Эсеп палатасы менен ошол эле прокуратура мурдараак жүргүзгөн текшерүүлөр эч ката тапкан эмес.
"Ал оорулуулар төлөшү мүмкүн болгон гана акчалар, чынында, алар төлөнгөн эмес, божомолдонгон гана болчу. Мурда оорулуулар клиникада канча күн болушу керек деп бекитилген мөөнөт жок болчу", — дейт дарыгер.
Директор эмне үчүн бейтаптарды борбордо дарылоо мөөнөтү мыйзам бузгандык болуп калганын борбордо эми түшүнүшкөнүн белгиледи.
"Бир орун үчүн бейтап бир жатканда 5 миң 800 сом төлөйт. Бирок алар көп учурда оор абалында келип түшкөндүктөн, абалы жакшырганга чейин жатып дарыланышат", — деди Султангазиева.
Прокуратура бул жагдайды мыйзам бузуу катары баалаганын, себеби борбордо орунду бейтап сегиз гана күн ээлеши керек, алар болсо 10 күн да, 20 күн да жаткан учурлары болот деп белгиледи ал.
"Биз оорулууларды кууп чыга албайбыз да. Алар ансыз деле кымбат дарыны өз чөнтөгүнөн алышат. Анан сегиз күндөн кийин палатадагы орун үчүн да кайра акча алмак белек", — деди борбордун жетекчиси.
Дарыгерлер өз күнөөсү жоктугун тергөө учурунда бардык зарыл документтерди берүү менен далилдеше турганын баса белгиледи ал.
"Бизде дарыга эмес, баштапкы төлөмдү төгө албаган албаган оор абалдагы бейтаптар болгон. Алардын абалын көрүп туруп, акы алган эмеспиз, ошон үчүн прокуратура эсептеп чыкан сумма ушунча болду", — деп түшүндүрдү врач.
Султангазиева мамлекет айыккыс шишик ооруга чалдыккандардын дары-дармегине жана дарылануусуна акы төлөйт, башка бейтаптардын мындай жеңилдиктери жок экенин белгиледи.
"Каражаттарды коромжу пайдалануу жөнүндө ЖМКдагы билдирүүлөрдөн кийин дарыгерлер күнү-түнү бейтаптардын дарты менен алп урушкандарына карабай, кылмышкер атка конуп калышты", — дейт директор.
Башкы прокуратуранын маалыматында 2013-жана 2014-жылдары төмөнкү бөлүмдөр боюнча борбордун атайын эсебине каражаттар түшпөй калган:
- абдоминалдык онкология — 603 999 сом;
- онкологиялык проктология — 314 330 сом;
- шишикке чейинки оорулар — 530 478 сом;
- торакалдык онкология — 592 630 сом;
- баш жана моюн шишиги — 1 миллион 993 962 сом;
- онкологиялык урология — 158 840 сом;
- онкологиялык гинекология — 3 миллион 288 836 сом.
Учурда тергөө жүрүп жатат.
