БИШКЕК, 29-июль — Sputnik. Саламаттык сактоо министрлигине караштуу Бишкек шаарындагы Улуттук онкология борборунун жетекчилигине карата кылмыш иши козголду. Бул туурасында Башкы прокуратуранын маалыматы кызматы билдирди.
Мыйзам боюнча, Улуттук борбор онкологиялык эмес жана зыянсыз шишик менен ооруган адамдарды жеке каражаттын эсебинен дарылайт.
Маалыматка ылайык, мекеменин кирешесин текшерүү учурунда 2013-2014-жылдарда оорулуулардын каражаты каттала турган атайы эсепке жети миллион 483 миң сомдун түшпөгөндүгү аныкталган.
Мекеменин жетекчилигине Кылмыш жаза кодексинин 304-беренесинин (кызмат абалынан кыянаттык менен пайдалануу) жана 171-беренесинин (ишенип берилген мүлктү өзүнө ыйгарып алуу) негизинде кылмыш иштери козголду.
Учурда тергөө иштери жүрүп жатат.
