БИШКЕК, 30-июль — Sputnik. Премьер-министр Темир Сариев салттуу ислам динин жана кыргыз элинин өзүнүн каада-салтын сактап калууну колдойт, деди вице-премьер Абдрахман Маматалиев.
Сариев өлкөдөгү диний кырдаал жана коопсуздук маселелерине арналган жумушчу жыйында салттуу исламдын баалуулуктарын кармануу жана кыргыз элинин каада-салт, үрп-адаттарына жат көрүнүштөрдү динге жамынып таңуулоо аракетине каршы туруу зарылчылыгын билдирген.
Өкмөт башчынын айтканы коомчулук арасында түрдүү пикирлерди жараткан.
"Премьер-министр өсүп келе жаткан муунга туура багыт берүү боюнча айткан. Динди терең түшүнбөй туруп, диний-экстремисттик уюмдардын катарына кирип жаткан жаштарга өзгөчө көңүл буруу зарылдыгын белгилеген", — деди Маматалиев.
Вице-премьер өкмөт башчы буга байланыштуу окумуштуулар менен диний ишмерлерди жарандык коом арасында салттуу исламдын баалуулуктарын жайылтуу, түшүндүрүү иштерин жүргүзүүгө чакырарын маалымдады.
"Кыргыз элинин улуттук кийими көп кылымдык каада-салты менен бирге өнүккөн маданияттын маанилүү бөлүгү. Кийим-кечебиз аба-ырайына эле эмес, көчмөн жашоого да ылайыкташкан", — деди чиновник.
Маматалиев кыргыз эли өз маданиятын, тилин жана тарыхын сакташы керектигин кошумчалады.
