БИШКЕК, 28-июль — Sputnik. Бишкек мэриясы Киев жана Бөкөнбаев көчөлөрүн бир тараптуу кылууну пландап жатканын Sputnik агенттигине вице-мэрдин милдетин аткаруучу Геннадий Милицкий билдирди.
Анын айтымында, мындай чечим долбоордун топ тарабынан кабыл алынган. Бул шаардагы автотыгындарды азайтуу максатында жасалууда. Сентябрь же октябрь айынан тарта аталган жолдор бир тараптуу болушу мүмкүн.
Милицкийдин айтымында, Киев көчөсү чыгыш тарапты көздөй, ал эми Бөкөнбаев көчөсү батышты карай бир тараптуу болот. Ошол эле учурда, Москва менен Токтогул көчөлөрү бир тараптуу бойдон гана калат.
Ал жол белгилерин орнотуу үчүн каражат керектигин айтып, канча акча керектеле турганын тактаган жок.
