БИШКЕК, 23-июль — Sputnik. Бишкекте 105-сериядагы бир бөлмөлүү батирлердин баасы кескин төмөндөп кеткенин Мамлекеттик каттоо кызматы билдирет.
Маалыматка ылайык, жүргүзүлгөн анализ үстүбүздөгү жылдын март айынан баштап батирлер шаардын Жал жана 12-микрорайондорунда арзандаганын аныктаган.
Сатуучу менен алуучулардын олку-солкулугу Тунгуч кичирайонунда да батирлердин арзандашына алып келген. Жүргүзүлгөн анализ бир нече убакыттан кийин баа кайрадан көтөрүлүшү мүмкүн экенин айгинелейт.
Көк-Жар кичирайонунда да батирлердин баасы бир ордунда турбай, жыл башындагы баадан 26 пайызга төмөндөп кеткен. Адистер бул баа көпкө чейин сактала турганын айтышууда.
Анализ калаанын 5-кичирайонундагы батирлер да өткөн жылдын ушул маалындагы баасына караганда кыйла төмөндөп кеткенин көрсөттү. Ал эми 10-кичирайондо баа көп өзгөргөн эмес.
Текшерүүнүн жыйынтыгы менен мекеме 10-, 12- жана Тунгуч кичирайондорунан башка аймактарда бир бөлмөлүү батирлердин баасы көтөрүлүшү мүмкүн экенин белгилейт.
