БИШКЕК, 8-ноя — Спутник Кыргызстан. Кыргызстандагы турак-жайдын бир чарчы метри орто эсеп 12 миң 800 сом турат. Мындай маалымат Улуттук статистикалык комитетинин тараткан билдирүүсүндө айтылат.
Эксперттердин баалоосу боюнча 2014-жылдын 9 айынын жыйынтыгына ылайык, шаар жериндеги үйдүн бир чарчы метри орто эсеп менен 15 миң 500 сом болсо, айыл жеринде 10 миң 300 сом деп бааланган. Үй сатып алуу Бишкек шаарында эң кымбат. Анын баасы орточо эсеп менен чарчы метрине 18 миң 700 сом. Ал эми Ош шаарында эң арзан. Бул жактагы турак-жайлардын бир чарчы метринин орточо баасы 7 миң 800 сом. Баткен шаарында – 8 миң 700 сом болсо, Ысык-Көл облусунда 9 миң сомдун айланасында деп бааланган.
Андан сырткары 9 ай ичинде 5 миң 907 батир колдонууга берилген. Бул көрсөткүч былтыркыга салыштырмалуу 4,4%га көп. Колдонууга берилген батирлердин саны боюнча Бишкек шаары, Жалал-Абад, Ош, Чүй облустары турат.
