БИШКЕК, 23-июль — Sputnik. Премьер-министр Темир Сариев Түркия Өкмөтүнө Кыргызстандан экспорттолгон төө бурчакка бажы төлөмүн төмөндөтүү маселесин карап чыгуу сунушун киргизди. Бул тууралуу ал Түркиянын ТИМи Мевлюд Чавушоглу менен жолугуп жатканда айтты.
"Кыргызстанда өстүрүлгөн төө буурчактын басымдуу бөлүгү Түркияга экспорттолуп келет, бирок, 2014-жылдан тарта төө буурчакка бажы төлөмдөрү жогорулатылганына байланыштуу аны экспорттоо пайдасыз болуп калды", — деди Сариев.
Буга байланыштуу өкмөт башчысы Түркиянын өкмөтү бул маселеге көӊүл буруп, аны оңдуу чечип берээрине ишенимин билдирди.
Өкмөт башчы түрк ишкерлери өз каражаттарын Кыргызстандын энергетика, тоо-кен өндүрүшү тармактарына инвестициялай ала тургандыгын айтты.
Мевлюд Чавушоглу өлкөлөр аралык кызматташтыктын чыңдалышына колдон келген аракетин жасаарын айтты.
"Жолугушууда көтөрүлгөн маселелердин бардыгы Түркия жетекчилигине толугу менен маалымдалат. Биздин өлкө кыргызстандыктарды колдоого алууга даяр жана биз жемиштүү кызматташууга ишеним билдиребиз", – деди Чавушоглу.
Түркиянын тышкы иштер министринин Кыргызстандагы иш сапары 24-июлга чейин уланат.
