БИШКЕК, 23-июль — Sputnik. Премьер-министр Темир Сариев менен жолуккан Түркиянын тышкы иштер министри Мевлют Чавушоглу жыл өткөн сайын кеңейип жана бекемделип жаткан кыргыз-түрк кызматташтыгын дагы өнүктүрүүгө кызыкдарлыгын билдирди.
Жакында Кыргызстанда коопсуздук кызматтары тараптан террордук топтун мүчөлөрү кармалганын айтып, учурдагы кырдаал экстремизм, терроризмге каршы биргеликте чараларды күчөтүү зарылдыгын жаратып жатканын айтты.
Премьер-министр Кыргызстан менен Түркиянын ортосунда тереӊ ишенимге негизделген мамиле бар экенин белгилеп, аны мындан ары карай кеӊейтүүгө мүмкүнчүлүк бар экенин билдирди.
"Кыргызстан менен Түркиянын ортосундагы мамилени бардык тармакта дагы бекемдеп, мамилебизди өнүктүрүү зарыл. Буга чейин эки өлкө ортосундагы соода жүгүртүүнүн көлөмүн бир миллиард долларга жеткирүүнү максат кылган элек. Учурда аны ишке ашыра элекпиз. Жакынкы аралыкта кызматташтыкты күчөтүп, бул максатты ишке ашыруубуз керек", — деди Темир Сариев.
Кыргызстанга иш-сапар менен келген Түркиянын тышкы иштер министри буга чейин Мевлют Чавушоглу кыргызстандык кесиптеши Эрлан Абдылдаев менен жолугуп, президент Алмазбек Атамбаевдин кабыл алуусунда болгон.
