БИШКЕК, 10-июль — Sputnik. Шанхай кызматташтык уюмунун каржы институтун түзүү – биринчи кезектеги маселелердин бири деди Кыргызстан президенти Алмазбек Атамбаев Уфада өтүп жаткан ШКУ саммитинде.
"Соода-экономикалык кызматташуунун өнүгүүсү туруктуулук менен коопсуздуктун бирден бир негизги өбөлгөсү болуп саналат. Биздин бул жааттагы макулдашуулар эртерээк иш жүзүнө ашышы керек. Мында, биздин пикирибизде, экономикалык кызматташуу программасын аткарууну каржылай турган ШКУ финансы институтун түзүү керек", — деди Атамбаев ШКУнун кеңейтилген жыйынында.
ШКУ курамына Россия, Кытай, Казакстан, Кыргызстан, Тажикстан жана Өзбекстан мамлекеттери кирет. Афганистан, Индия, Иран, Монголия жана Пакистан өлкөлөрү байкоочу статусуна ээ. Өткөн жылдын сентябрь айында Индия менен Пакистан уюмга кирүү тууралуу өтүнүч кат келтирген. Буга чейин тышкы саясат боюнча РФ президенти Путиндин жардамчысы Юрий Ушаков Индияда өтө турган саммитте Индия менен Пакистандын уюм мүчөлүгүнө толугу менен кириши аяктай турганын билдирген.
