БИШКЕК, 9-июль — Sputnik. Кыргызстан менен Кытайдын изилдөө институттары кызматташуунун келечегин талкуулашканын Улуттук стратегиялык изилдөө институту билдирди.
Мекеменин жетекчиси Талант Султанов Пекин университетинин Эл аралык стратегиялык изилдөө институтунун аткаруучу директору Гуан Гуэйхай менен жолугушту. Иш-чарага эки тараптын илимий кызматкерлери катышканы маалымдалууда.
Жолугушууда институттар аралык кызматташуу маселелери талкууланып, "Жибек жолундагы экономикалык алкак", Борбор Азиядагы заманбап интеграция процесси жана Кытай менен Кыргызстандын тарых барактарын аныктоо максатында институттардын өз ара иштешүүсүн жөнгө салуу маселелери каралды. Тарых боюнча изилдөөлөр эки мамлекеттин тарыхчыларынын катышуусу менен Кытай архивинде сакталган маалымат булактарынын негизинде жүргүзүлмөкчү.
