БИШКЕК, 6-июль — Sputnik. Ош облусунун Өзгөн районундагы орто мектептин спорт залын курууда бюджеттик каражаттын максатсыз пайдаланылган фактысы аныкталганын УКМК маалымат кызматы билдирди.
2007-жылы стимул берүүчү гранттын эсебинен Мамлекеттик экономиканы өнүктүрүү фонду Өзгөн районундагы Үч-Каптал айылынын орто мектебине жалпы наркы 3 миллион 287,7 миң сомдук спорт залын кура башталган. Анын 3 миллион 167,7 миң сому бөлүнгөн.
Жаңы смета түзүлүп, ага ылайык, курулуш иштери үчүн кошумча 2 миллион 226 миң сом бөлүнгөн. Аны кайрадан жарыяланган тендердин жеңүүчүсү "Карынбай Ата" ишканасы жүргүзгөн. Бирок текшерүү иштеринин натыйжасында, аталган ишкана тарабынан 80,2 миң сомдук иштери аткарылбай калганы аныкталган, мындан тышкары, компания калган 570 миң сомдун документин көрсөтө алган эмес.
Бул фактылардын негизинде үстүбүздөгү жылдын 30-июнунда УКМК тарабынан Кылмыш жаза кодексинин 171-беренеси (Ишенип берилген мүлктү өзүнө ыйгаруу же пайдалануу) боюнча кылмыш иши козголду.
Учурда тергөө иштери жүрүп жатат.
