БИШКЕК, 2-июль — Sputnik. Депутаттар 20-июлга чукул Кыргызстандын акыйкатчысын шайлоо үчүн кезексиз жыйынга чогулат деп билдирди Sputnik маалымат сайтына депутат Абдыманап Кутушев.
Мурдагы Омбудсмен Аманбаевдин аткарган иштери боюнча маалыматын угуп, парламент ага канааттанбагандыктан улам, көпчүлүк фракциясынын 56 депутаты макул деген добуш берүү менен кызматтан кеткен.
Мыйзамга ылайык, эгерде акыйкатчы кызматын мөөнөтүнөн мурда токтотсо, жаңысын шайлоо бир айдан кийин болот.
Кутушевдин айтымында, учурда фракциялар үчтөн талапкерди аныктап, Адам укуктары, конституциялык мыйзамдуулук жана мамлекеттик түзүлүш комитетинин кароосуна жөнөтөт.
"Талапкерлерди аныктоого алардын бир ай убактысы бар. Жыйынтыгында биз ЖКнын кароосуна талапкерлердин тизмесин беребиз", — деди Кутушев.
Кутушев, эгерде Акыйкатчыны шайлоого белгиленген күн дем алыш же майрамга туура келип калса, ал кечирээк мөөнөткө жылдырыларын айтты.
Депутат КСДП фракциясы Акыйкатчыга талапкерлердин тизмесин түзө электигин кошумчалады.
