БИШКЕК, 25-июнь — Sputnik. Аялынын жокутугунан пайдаланып күйөөсү эки жашар баласын 50 миң сомго сатып жибергенин Акыйкатчы институтунун маалымат кызматы билдирди.
Акыйкатчынын аппаратына Токтогул районунун тургуну кайрылып, бир жылдан бери эки жаштагы баласын кайтарып ала албай жүргөнүн билдирген.
Маалыматка ылайык, баласы сатылган аял күйөөсү менен никеси болгонуна карабай, чогуу жашабайт. Аялдын сатылып кеткенден башка дагы эки баласы бар.
Акыйкатчы институту билдиргендей, баласы сатылганын билген эне Кыргызстанга келген. Баланы сатып алган аял менен жолукканда ал аны кайтарып бербесин, себеби көп акча төлөгөнүн айткан.
Бул окуя боюнча кайрылган эненин арызын бир да мамлекеттик орган, анын ичинде Чүй облусунун Аламүдүн РИИБи да кабыл албай койгон.
"Бала күйөөсү тарабанын өз макулдугу менен берилген деп милиция органдары иш козгоодон баш тарткан", — деп билдирди Акыйкатчы институту.
Омбудсмен Бактыбек Аманбаев бул окуяны өз көзөмөлүнө алып, маселени чечүүгө көмөк берүү үчүн тийиштүү бөлүмдөргө тапшырма берген.
Буга чейин Талас облусунун тургуну да өз баласын сатып жибергени аныкталган. Кийин аны укук коргоо органдары энесине кайтарып берген болчу.
