БИШКЕК, 15-июнь — Sputnik. Талас облусунда 2,5 жаштагы Абдували аттуу баланы атасы сатып жибергенин акыйкатчынын маалымат кызматы билдирди.
Бул боюнча Мунара Болотбек кызынын арызын Талас ОИИБ кабыл албай койгон.
Акыйкатчынын маалымат кызматынын жетекчиси Бактыбек Рысалиев Sputnik маалымат агенттигине билдиргендей, омбудсмендин аймактагы өкүлчүгүнүн кийлигишүүсүнөн кийин гана арыз кабыл алынып, анын негизинде кылмыш иши козголгон.
"Бизге арыз түшкөндөн кийин төрт күн ичинде аталган факт боюнча кылмыш иши козголду. Азыр окуянын чоо-жайы тууралуу маалымат жок. Анткени тергөө иштери жүрүп жатат", — деди жетекчи.
Рысалиев сатылган бала аман-эсен экенин билдирди.
"Наристе Нарын тарапка сатылып кеткен. Учурда Абдували аман-эсен. Толук маалымат такталгандан кийин дагы кошумчаланат", — деди ал.
Кылмышка шектүү делген баланын атасы Бактыбек Жээналиев учурда издөөдө.
