БИШКЕК, 19-июнь — Sputnik. Россия Батыштын санкцияларына жооп кылып, ишкердик үчүн эркиндикти кеңейтет деп билдирди Петербургдагы экономикалык форумда Россия президенти Владимир Путин.
Анын айтымында, РФ бийлиги капиталдын кыймылын чектөө чарасын көрүүсүз эле валюталык курсту турукташтыра алды.
"Салык ченемдери, мамлекеттик бюджетке болгон кысымга карабай, төрт жылга бекитилүүдө", — деди РФ президенти.
Путин салык каникулдары жеке ишкерлер үчүн улантылып жатканын айтты.
"Өз ишинде олуттуу мыйзам бузууларга жол бербеген чакан ишкердик объектилери текшерүүлөрдөн үч жылга бошотулат", — деп баса белгиледи РФ башчысы.
Путин, оор мезгилге карабай, Россиянын экономикасына салымдарды жасоо менен эртеңки күнгө ишеним берип жаткан бардык тараптарга ыраазылык билдирди.
Ал экономиканын өсүш кыймылдаткычтарынын бири болгон Россиянын керектөөчүлүк суроо-талабы кайра калыбына келе баштаганын белгиледи.
"Биз силердин көпчүлүгүңөр менен бир жыл мурун да жолукканбыз. Дүйнөлүк да, россиялык да экономика өнүгүүгө жеткен бул мезгил аралыгында кырдаал өзгөрдү жана айрым багыттар боюнча бул өзгөрүүлөр олуттуу болду. Биз дагы эле дүйнөлүк капитал рыногуна катышуу жагынан чектелгенбиз. Буга биздин өзүбүздүн экспорттук товарлардын баасы түшүп кеткенин да кошуу керек", — деди президент.
Путин өкмөткө РФте өндүрүштөрдү жаңыртууга өбөлгө боло турган сунуштарды берүүнү тапшырды.
