БИШКЕК, 19-июнь — Sputnik. Петербургдагы эл аралык экономикалык форумда Кыргызстандын ишкерлери да катышууда деп билдирет КР Соода-өнөр жай палатасынын маалымат кызматы. Делегацияны Соода-өнөр жай палатасынын президенти, ШКУнун Ишкерлер кеңешинин Кыргызстан тараптан улуттук бөлүгүнүн төрагасы Марат Шаршекеев баштап барган.
Жолугушууда Евразиялык экономикалык биримдиктин алкагында ШКУга мүчө өлкөлөрдүн ишкер чөйрөлөрүнүн өз ара аракеттенүү маселеси талкууланды. Тараптар экономикалык кызматташтык долбоорлорун да карашты. Отурумдун жүрүшүндө ШКУнун Ишкердик кеңешинин мындан аркы иши жөнүндө сунуштар айтылды.
Санкт-Петербургда уюштурулган эл аралык экономикалык форум (ПЭЭФ-2015) 20-июнга чейин созулат. Форум жыл сайын дүйнө боюнча саясий лидерлерди жана эң ири ишкерлерди топтойт. Уюштуруучулардын маалыматына ылайык, быйыл форумга 115 өлкөдөн катышуучулар келди. Бул жолку саммит "Иш-аракет жасоо мезгили келди: биргелешкен күч-аракеттер менен туруктуулукка жана өсүшкө карай" урааны астында өтүүдө. Негизги суроолордон тышкары, форумдун алкагында чакан жана орто ишкердикти өнүктүрүү, коррупцияга каршы туруу, кризиске каршы саясат маселелери да талкууланат.
