БИШКЕК, 17-июнь – Sputnik. Казакстанда иш сапардын алкагында эл аралык конференцияга катышкан Жогорку Кеңештин спикери Асылбек Жээнбеков кыргыз тили акырындык менен өз ара пикир алышуудагы бириктирүүчү милдетти өтөй баштагандыгын айтты.
"Президент Алмазбек Атамбаев тарабынан өлкөнүн өнүгүшүндө жана өзүнүн мамлекеттүүлүгүн бекемдөөдө кыргыздар Кыргызстандын көп улуттуу элин бириктире турган бирдиктүү өзөк катары таанылды. Ар жаран бул биздин өлкө экенин, биз баарыбыз анын келечек тагдыры үчүн жоопкерчилик тартарыбызды эстен чыгарбашы керек. Кыргыз тили акырындык менен адамдардын өз ара пикир алышуусундагы бириктирүүчү милдетти өтөй баштады. Калктын калыӊ катмары кыргыз тилин колдонушу бириктирүүчү күч катары түрткү берүүдө", — деди Жээнбеков.
Төрага Казакстан элинин ассамблеясынын 20 жылдыгына арналган "Казакстандын жолу: Биримдик. Атуулдук. Реформалар" аттуу эл аралык конференцияга катышты.
Жээнбеков кыргыз эли менен кыргыз тилинин өлкөдөгү улуттар аралык туруктуулукту камсыз кылуудагы ролуyн жана жоопкерчилигин белгиледи.
"Эл биримдиги менен улут бекемдиги – мамлекеттин туруктуулугу менен өнүгүү негизи. Биздин эл тынчтыктын, туруктуулуктун, өлкө өнүгүүсүнүн, демек, жарандардын бакубат турмушунун кепилдиги болуп саналган улуттар аралык биримдикти жогору баалайт", — деди Жээнбеков.
Спикер жетектеген парламенттик делегация Казакстанга аталган өлкөнүн Мажилисинин төрагасы Кабибулла Жакуповдун чакыруусу менен 15-июнда кеткен.
