БИШКЕК, 16-июнь — Sputnik. Январь-май айларында республикалык бюджетке алдын ала эсептөөлөр боюнча 39,5 миллиард сом түшкөнүн жана бул пландалгандан 9,9 пайызга көп экенин Каржы министрлигинин маалымат кызматы билдирди.
Киреше негизинен Бажы жана Салык кызматарынан түшкөн.
Салыктан түшкөн каражаттардын жалпы көлөмү 26,9 миллиард сом. План 2,1 пайызга ашык аткарылган.
Бажы кызматынан 14,2 миллиард сом, Салык кызматы республикалык бюджетке 12,7 миллиард сом төккөн.
Ал эми беш айда жалпы республикалык чыгаша 46 миллиард 175 миллион сом болот деп пландалган болсо, иш жүзүндө ал 43,1 миллиард сомду түзүп, пландалган сумманын 93,4 пайызына жеткен. Өткөн жылдын ушул мезгилине салыштырмалуу жалпы чыгым 5 миллиард 226,3 миллион сомго көбөйгөн.
