БИШКЕК, 15-июнь — Sputnik. Кыргызстанда биринчи жолу азиздер үчүн чекиттүү Брайль жана ири жалпак тамгалар менен жазылган кыргыз тили боюнча китеп жарыкка чыкканын ЖК депутаты Дастан Бекешев билдирди.
Анын айтымында, окуу китептери өлкө президенти Алмазбек Атамбаев тарабынан бөлүнгөн каражатка басылып чыккан.
Депутаттын айтымында, Кыргызстан эгемендүү мамлекет болгондон бери азиздер жана көрүүсү начарлар үчүн кыргыз тили боюнча китеп басылган эмес.
"1991-жылдан баштап азиздер жана көрүүсү начарлар үчүн Кыргызстанда китеп басылып чыкпай калган. Мугалимдер совет доорунда чыккан эскилиги жеткен китептер менен сабак берүүгө аргасыз болуп келишкен. Бул китептерди окуучулар колу менен окугандыктан ал сүрүлүп, жыртылып калат", — дейт депутат.
Китептердин барактары калың болгондуктан, брайль тамгалары менен жазылган бир китеп 4-6 томдон турушу мүмкүн.
