БИШКЕК, 27-фев — Sputnik. Бишкек менен Оштогу азиз балдардын атайын адистештирилген мектеби үчүн Кыргызстандын тарыхы боюнча окуулуктар басылды деп билдирди Sputnik маалымат сайтына "Бирдей мүмкүнчүлүктөр" социалдык борборунун директору Владимир Ганжела.
Анын айтымында, китептин басылышына каражатты өлкөдөгү коммерциялык банктардын бири төлөп берди.
"КР тарыхы боюнча бешинчиден – 11-класска чейин Билим берүү министрлиги тарабынан бекитилген адаттагы эле китептердин көчүрмөсү", — деп айтты Ганжела.
Бардыгы болуп Брайлдын ариптери менен 485 том жана ири жалпак ариптеги менен 175 том басылды.
"Булар Бишкек менен Оштогу атайын мектептерде Кыргызстандын тарыхы боюнча китептерге болгон муктаждыкты канаттандырат. Азыр азиз балдар үчүн өлкөнүн түндүк жана түштүк борборлорунда ачылган атайын эки мектепте начар көргөн жана азиз болгон 300дөн ашуун окуучулар билим алып жатышат", — деп билдирди социалдык борбордун жетекчиси.
Муну менен катар эле балдарга башка предметтер боюнча китептер жетишпейт.
"Бизге өлкө президенти жакшы жардам берип турат, биринчиден тарта 11-класска чейин кыргыз тили боюнча окуулуктарды басууга каражат бөлүп берди", — деди Ганжела.
Быдырлуу тешикчелүү Брайль ариби — көрбөгөн жана начар көргөндөр үчүн ылайыкталган. Аны 1824-жылы 15 жаштагы франциялык Луи Брайль ойлоп тапкан.
Тамгаларды таануу үчүн Брайль арибинде эки тик сызыкка үчтөн жайгашкан алты чекит жайгашат. Ариптин өзгөчөлүгү текст оңдон солго жазылат, андан кийин баракталып, текст солдон оңго окулат.
