БИШКЕК, 15-июнь — Sputnik. Премьер-министр Темир Сариев 13-июнь күнү Токтогул ГЭСиндеги оңдоо иштерин текшергенин өкмөттүн маалымат кызматы билдирет.
Сариев бүгүнкү күндө 22 пайызга жеткен техникалык жоготуулар өтө көп экенин белгиледи. Өкмөт башчынын пикиринде, бул коррупциялык схемалардын жана уурдоолордун натыйжасында келип чыккан.
"Энергетика — бул элдин байлыгы. Коррупциялык көрүнүштөрдү жоюп, элди электроэнергия менен тынымсыз камсыз кылуу зарыл. Техникалык жоготуулар коррупция жана уурдоонун натыйжасында болуп жатат. Муну жоюп, энергетика чөйрөсүндөгү менеджментти жакшыртуу керек", — деди Сариев.
Мындан улам "Кыргызстандын улуттук электр түйүнү" ААКнын жетекчиси Медетбек Айткуловго техникалык жоготуулардын санын беш пайызга чейин кыскартуу тапшырмасы берилди. Айткулов өз кезегинде "Датка-Кемин" электр линиясы 31-августта өз мөөнөтүндө эксплуатацияга берилерин убада кылды.
