БИШКЕК, 12-июнь — Sputnik. Маданият, маалымат жана туризм министринин орун басары Максат Чакиев үй камагына чыгарылганын Sputnik сайтына Бишкек шаардык прокуратурасынан билдиришти.
29-майда ИИМден билдиришкендей, Чакиев Бешинчи башкы башкармалыктын кызматкерине "ишти оң жагына чечип берүүсү жана мындан аркы текшерүүнү токтотуу үчүн" 92 миң сом пара сунуштаган. Министрдин орун басары экинчи жолу пара берип жатканда кармалган.
Шаардык прокуратуранын өкүлүнүн айтымында, Чакиев бейшембм күнү үй камагына чыгарылган. Мындай чечимди Бишкек шаардык соту кабыл алган. Анын үй камагына чыгарылышы боюнча толук маалымат азырынча жок.
Чакиев Кылмыш жаза кодексинин эки беренеси боюнча айыпталууда. ИИМдин маалыматына ылайык, Бешинчи башкы башкармалыктын ыкчам текшерүүсү учурунда Чакиевдин "документ жасап жана кызмат абалынан кыянаттык менен пайдаланганы" аныкталган.
