БИШКЕК, 11-июнь — Sputnik. Ысык-Көл облусунун Жети-Өгүз районундагы Саруу айылында өспүрүмдүн өз өмүрүн кыйгандыгы боюнча кылмыш иши козголгонун Башкы прокуратуранын маалымат кызматы билдирди.
Маалыматка ылайык, Жети-Өгүз районунун прокуратурасына баланын ата-энеси РИИБ кызматкери жана С.Сыдыков атындагы мектеп мугалимдерине карата чара көрүү боюнча арыз менен кайрылган. Алардын айтымында, баланын өлүмүнө мектептеги басынтуу, мындан улам анын психикалык жактан жабыркоосу себеп болгон.
Алдын ала текшерүүнүн натыйжасында, бала мектептеги окутуучулардын басынттуусунан улам 2015-жылдын 7-майында өмүрүн кыйганы аныкталды.
Жети-Өгүз районунун прокуратурасы тарабынан кылмыш жаза кодексинин 102-беренеси (өзүн өзү өлтүрүүгө жеткирүү) жана 316-беренеси (Шалаакылык) боюнча кылмыш иши козголду.
Учурда иликтөө иштери жүрүп жатат.
