БИШКЕК, 8 июнь— Sputnik. Премьер-министр Темир Сариев Бишкек шаарынын жолдорун өңдоп-түзөө иштерин текшерүүдөн өткөргөнүн өкмөттүн маалымат кызматы кабарлайт.
Өкмөт башчы Бишкектин жана жалпы республиканын жолдорун оңдоо мамлекеттин башкы маселелеринин бири экенин белгиледи. Буга республикалык бюджеттен кошумча каражат бөлүнгөн. Премьер-министр бардык иштер өз мөөнөтүндө аякташы керектигин билдирди.
"Мындан кийин Бишкектин жолдорун оңдоп-түзөө иштерине мэрия жана жолдорду тейлөө боюнча атайы муниципалдык ишкана жоопкерчиликтүү болот", — деди Сариев.
Бишкек мэри Кубанычбек Кулматов өкмөт башчынын тапшырмасы менен "Бишкек асфальт сервис" муниципалдык ишканасы багытын өзгөртүп, борбор кааланын жолдорун оңдоону өз мойнуна аларын маалымдады.
Бишкек жолдорунун курулушу жана оңдоп түзөө иштери толугу менен Сариевдин көзөмөлүндө болорун өкмөттүн маалымат кызматы белгилейт.
