БИШКЕК, 4-июнь — Sputnik. Жогорку Кеӊеште депутаттар демилгеленген Кыргызстандын аймагынан ташып чыгарылуучу товарларга экспорттук бажылык алымдардын ставкасын аныктаган мыйзамдын долбоору каралып, анын концепциясы биринчи окууда добуш берүүгө жөнөтүлдү.
Демилгечилердин бири Айнуру Алтыбаеванын айтымында, баалуу металл рудаларын чет өлкөгө ташып кетип иштетүү жылдан-жылга күчөп баратат, ошондон улам аларга бажы алымын киргизип, мамлекеттик казынаны толтуруу мүмкүнчүлүгү бар.
"2014-жылы Казакстан менен Кытайга чыгарылып кеткен алтын рудаларынын өлчөмү 4 миӊ тоннадан ашты. Биз 2015-жылы 15 пайыз бажы алымын киргизүүнү, ал эми 2016-жылы аны 20 пайызга чейин көтөрүүнү сунуш кылдык. Бул мыйзам кабыл алынса, бюджетке кошумча каражат түшө баштайт", — деди Алтыбаева.
Ал эми депутат Эркин Сакебаев демилгечилер мыйзам долбоорун даярдоонун жүрүшүндө тереӊ талдоо кылышпаганын, мыйзамга мындай мамиле кылуу туура эмес экенин баса белгиледи.
