Кулов: шайлоонун күнү түрдүү себептер менен жылдырылды

БИШКЕК, 4-июнь — Sputnik. Парламенттик шайлоону өткөрүү күнүн белгилөөдө мыйзамга таяныш керектигин парламенттик көпчүлүк коалициянын лидери Феликс Кулов билдирди.

Мурдараак Борбордук шайлоо комиссиясынын төрагасы Туйгунаалы Абдраимов парламенттик шайлоону 24-октябрга аныктоону сунуштаган. Ал алдыдагы парламенттик шайлоо күнү туура белгиленгендиги боюнча түрдүү пикирлер болупп жатканын айтты.

"Мурунку шайлоо өткөн 10-октябрь эсептин башы деп алынышы керекпи же шайлоонун жыйынтыктары жарыяланган 10-ноябрь эсеп башы болобу? Шайлоо күнүн тандоодо түрдүү пикирлер болгондуктан, бул маселе парламентте талкууланышы керек", — деди Кулов.

Мыйзамга ылайык, шайлоо парламенттин иш мөөнөтү аяктай турган айдын биринчи жекшембисинде өтөт. Бирок түрдүү пикирлер бар: бири октярбь айында эл талаа иштеринен бошобойт, түшүм жыйып, күздүк себүү убагында дыйкандарды алагды кылбаш керек десе, башкалары 4-ноябрды шайлоо күнү деп белгилеп алсак, улам кийинки шайлоолор болжол менен жарым айга алдыга жылат деп айтып жатышканын белгиледи саясатчы.

Шайлоо күнүн 4-октябрга белгилөөдө Конституция расмий бузулган болот, себеби депутаттар өз мөөнөтүнүн акырына чейин иштебей калат деп эсептейт коалициянын лидери.

"Кайсы вариант үстөмдүк кылып кетери азырынча белгисиз. Бирок 4-октябрь болору күмөндүү деп эсептейм, себеби бир жагдай бар, жана шайлоо күнүн жөн гана эсептеп чыгуудан башка бул суроонун саясий жактарын да эске алыш керек", — деди Кулов.

Анын айтымында, өкмөт шайлоо күнү катары айдын биринчи эмес, акыркы жекшембисин мыйзамга киргизүү сунушу менен парламентке кайрылуу даярдоодо. Себеби алар октябрда шайлоого даярданып, аны өткөрүүгө жетишпей жатышат. Сентябрда электрондук добуш берүү үчүн атайын техникалар келет. Аларды орнотуп, жөндөштүрүп, сынап көрүп жана эки миңден ашык шайлоо добуш берүүчү жайларда иштегендерди техниканы пайдаланганга үйрөтүш керек.

"Мунун баарын жасаганга убакыт жетишсиз, дал ушул жагдай шайлоо күнүн кийинкиге жылдыруунун башкы себеби. Алар бул күндү октябрдын акырына жылдырууну сурашат, бирок, эгер техника эртерээк келип калса, бул тоскоолдук чечилген болот. Кайсы күн белгиленсе да, айырмасы жок, бирок мен үчүн 4-октябрь болгону артык, себеби канчалык эрте болсо, ошончолук жакшы да", — деп кошумчалады көпчүлүк коалициянын башчысы.

Быйыл парламенттин VI чакырылышынын депутаттарын шайлоо болот, бирок президент да, Жогорку Кеңеш да, БШК да азырынча шайлоонун так күнүн расмий белгилей элек.