БИШКЕК, 3 июнь — Sputnik. Баш мыйзамга өзгөртүүлөрдү киргизүү шайлоочулар тарабынан демилгеленгенин парламенттин көпчүлүк фракциясынын лидери Феликс Кулов билдирди.
Коалиция лидеринин билдирүүсүндө, Баш мыйзамга өзгөртүүлөрдү киргизүү элдин пикирин эске алуу менен демилгеленген. Референдум алдында аталган өзгөртүүлөр кеңири талкууланат. Натыйжада өзгөртүүлөрдү киргизүү чечими парламент депутаттарынын 80 пайызынын колдоосуна ээ болушу кажет. Андан кийин ал Конституциялык палатанын кароосуна жөнөтүлөт.
"Бул үчүн иш-чаралардын планы иштелип чыгат. Талкуу радио жана теле аянттарында өтөт. Депутаттар эл менен жолугушат. Калкка маалыматты жергиликтүү бийлик органдары жеткирет. Бардыгы ачык жана демократиялуу болот", — дейт Кулов.
Май айынын аягында парламенттик фракциялардын лидерлери Чыныбай Турсунбеков, Өмүрбек Текебаев жана Феликс Кулов тарабынан "Баш мыйзамга өзгөртүүлөрдү киргизүү тууралуу" мыйзамы боюнча референдум өткөрүү мыйзам долбоору демилгеленген.
Апрель окуяларынан кийинки 2010-жылы өткөрүлгөн референдумда өлкөнүн башкы документине 2020-жылга чейин өзгөртүүлөрдү киргизүүгө мораторий жарыялоо чечими кабыл алынган. Мораторийди алып салуу үчүн жалпы элдик референдум өтүшү керек.
