БИШКЕК, 4-июнь — Sputnik. КРдин тышкы иштер министри Эрлан Абдылдаев Москва мамлекеттик эл аралык мамилелер институтунун (ММЭМИ) ардактуу доктору наамын алгандыгы тууралуу Кыргызстандын Россиядагы элчилигинин маалымат кызматы билдирди.
Абдылдаев 3-июнда окуу жайдын окутуучу профессорлору менен студенттеринин алдында лекция окуду.
Иш-чарага 20дан ашык мамлекеттердин элчилигинин өкүлдөрү жана 10 өлкөнүн элчилери катышты.
ММЭМИнин ректору Анатолий Торкунов Россия менен Кыргызстандын ортосунда мамилелер жемиштүү өнүгүп жана келишимдик-укуктук негиздер менен бекемделгенин белгиледи. Ректордун айтымында, буга 150дөн ашуун ченем-укуктук актылар кирген. КРдин ЕАЭБге кошулуш менен мындан аркы кызматташтыкка өбөлгө боло турган дагы жаңы мүмкүнчүлүктөр ачылат деди ал.
Институттун ректору ММЭМИнин окумуштуулар кеңеши Абдылдаевдин эл аралык кызматташтыкты өнүктүрүүдөгү зор эмгегин таануу менен ага "тынчтыкты жана эл аралык коопсуздукту бекемдөөдө, Россия менен Кыргызстандын ортосундагы ынтымакташтык мамилелерди өнүктүрүүгө кошкон салымы үчүн" ММЭМИнин ардактуу доктору наамын ыйгаруу жөнүндө чечимди бир добуштан кабыл алды.
Абдылдаев көрсөткөн сыйы үчүн ММЭМИнин окумуштуулар кеңешине жана жеке ректордун өзүнө ыраазычылык билдирип, өз институтунда эскерүүлөргө толгон сезимдери менен бөлүштү.
Иш-чаранын акырында окуу жайдын студенттери Абдылдаевге өзүлөрүн кызыктырган суроолорду беришти.
