БИШКЕК, 2-июнь — Sputnik. Алай районунун "Гүлчө" борбордук мечитинде райондун бардык айылдарынын жашоочулары жана имамдары үчүн диний сабатсыздыкты жоюу боюнча конференция өттү. Бул туурасында Ош облусунун мусулмандар казыятынын маалымат кызматынан билдиришти.
Жыйында Ош облусунун казысы Ниязалы Арипов келген жамаатка ынтымак, кечиримдүүлүк, ыйман жана илим алуу маселеси боюнча баян жасап, аят, хадистер менен кеңири түшүндүрүп берди.
Мындан сырткары илим алуу диний түшүнүктү жогорулатып, ар түрдүү терс агымдардын курмандыгы болуунун алдын алаарын өзгөчө белгиледи.
Мындай жыйындар Кыргызстандын диний чөйрөдөгү мамлекеттик саясатынын 2014-2020-жылдарга карата концепциясынын алкагында Ош облусунун Кара-Кулжа, Алай, Чоң-Алай, Өзгөн райондорунда өткөрүлдү.
