БИШКЕК, 29-май — Sputnik. Өзүнүн ким экенин эстей албаган карыянын баласы социалдык тармак аркылуу табылганын Бишкек ИИББдин маалымат кызматы билдирди.
Карыя жөнүндө маалымат интернетке чыккандан кийин Ноокат районунун тургуну аны таанып, карыянын баласына чалган. Өз кезегинде баласы милиция менен байланышкан. Маалым болгондой, карыя акыркы учурда Сокулук районунда баласы менен жашап жаткан жеринен 18-май күнү үйдөн чыгып кеткен бойдон дайынсыз жоголгон.
23-майга караган түнү Аламүдүн базарынан медициналык жардамга муктаж абышка табылган. "Тез жардам" кызматынын дарыгерлери аны шаардык ооруканалардын бирине жеткиришкен.
Ал өзүнүн ким экенин эстей албай, болгону шаарга түштүк аймактан келгенин, Кызыл-Кыя шаарында чоң көлмөнүн жанында жашай турганын жана Кубанычбек аттуу баласы бар экенин айткан.
