БИШКЕК, 29-май — Sputnik. Казакстанда кырылып калган сайгактардын жалпы саны 120 миңен ашты деп билдирди Казакстандын Айыл чарба министрлигинин маалыматына таянган РИА Новости.
Казакстанда сайгактардын көп сандагы өлүмү эки жума мурун катталып, жаныбардын кырылып жаткандыгы туурасында Акмоло, Актөбө жана Кустанай облустарынын өкүлдөрү билдиришкен. Жаныбарлардын жапырт өлүшүнүн алдын ала себеби деп чиновниктер пастереллёзду аташты. Бул сайгактын организминин туруштук берүүсү төмөндөгөндөн пайда боло турган жугуштуу илдет. Жаныбарлардын жапырт өлүмүнүн себептерин Эл аралык эпизоотикалык бюронун кызматкерлери да иликтөө ниетинде.
"Кустанай жана Актөбө облустарында өлгөн сайгактарды жок кылуу иштери аяктады. Кырылгандардын саны 112 475ке жетти", — деп билдирген "Новости-Казакстан" министрликке таянуу менен.
27-майга карата маалымат боюнча, Акмоло облусунун Жаркин жана Жаксын райондорунда 8 502 сайгактын өлүгү жок кылынды.
