БИШКЕК, 18-май — Sputnik. Жогорку Кеңештин депутаты Эркингүл Иманкожоева желим баштыктар арзан жана ыңгайлуу болгону менен айлана-чөйрөнүн көркүн бузуп,экологияга зыян тийгизип жатканын айтып, анын алдын алуу боюнча мыйзам долбоорун сунуштап жатат. Бул тууралуу Жогорку Кеңештин маалымат кызматы билдирди.
Мыйзамдын максаты — экологияны булгай турган товарларды импорттоого, өндүрүүгө жана сатууга тыюу салуу.
Эл өкүлдөрү аталган мыйзам долбоорун колдоого алып, анын ордуна кагаз баштыктарды өндүрүү же сатып алууну жолго коюу, же болбосо көп ирет пайдалануучу сумкаларды пайдалануу керектигин айтышты.
Жыйынтыгында мыйзам долбоорунун концепциясы кабыл алынып, Жогорку Кеңештин кароосуна сунушталды. Ошондой эле, бул мыйзам долбоору коомдук талкууга коюла турган болду.
