БИШКЕК, 14-май — Sputnik. Ош аэропортунда кол салуу менен 5 миллиондон ашык долларды уурдап кетүүгө катышкандар Казакстанда жана Россияда кармалганын Кыргызстандын Ички иштер министрлигинин маалымат кызматы билдирди.
Бул факт боюнча кылмыш иши козголуп, ыкчам териштирүү иштеринин жүрүшүндө ИИМдин Уюшкан кылмыштуулукка каршы күрөшүү башкы башкармалыгынын кызматкерлери аталган кылмышка тиешеси бар жети адамды кармашты.
Шектүү адамдар аныкталып, Кызыл-Кыя шаарынын тургунунун үйүн тинтүү учурунда, анын чатырынан АКМ жана АКС-74 автоматтары, магазиндери жана 50 огу менен кошо, ошондой эле номери өчүрүлгөн Макаров пистолети табылган. Андан тышкары, кол салууну уюштуруучу жана ага катышкандар аныкталган. Иш-чаралардын жүрүшүндө күч кызматкерлери кылмыштын төрт катышуучусун кармаган. Алардын үчөө Кызыл-Кыя шаарынын тургундары, дагы бирөө аталган шаарда жашап жүргөн Казакстандын жараны болуп чыкты.
Кармалгандардан 935 миң доллар жана 3,3 миң евро табылган.
Кылмыштын жетинчи катышуучусу Омск шаарында (Россия) колго түшүрүлдү. Азыр ал Омсктун убактылуу кармоочу жайында жатат жана аны КРге алып келүү маселеси чечилүүдө.
Аталган кылмыш иши боюнча ыкчам издөө жана тергөө иштери улантылып жатканы ИММдин маалыматында айтылат.
