БИШКЕК, 13-май — Sputnik. Чаткал районунда нөшөрлөп жааган жаандан улам, 300дөй койду сел агызып кеткенин Өзгөчө кырдаалдар министрлигинин маалымат кызматы билдирди.
Маалыматка ылайык, Жалал-Абад облусунун Чаткал районунун Терек-Сай айыл аймагындагы Кызыл-Токой айылында 12-майда саат 21:00 чамасында нөшөрлөп жааган жамгырдан улам Ала-Бука – Каныш-Кыя унаа жолунун 22-чакырымы шагыл жана таштарга толуп, унаа жолу убактылуу жабылган. Кызыл-Токой сайында суу кирип, жайыттан келе жаткан болжол менен 300дөй койду сел агызып кеткен.
Ала-Бука – Каныш-Кыя унаа жолун тазалоо иштерине ЖЭМ-17ден 1 жүктөгүч жана 1 грейдер тартылып, жол каттамы толугу менен ачылды. Жарандык коргонуу комиссиясы тактоо иштерин жүрүзүүдө.
