БИШКЕК, 16-апр — Sputnik. Тергөөнү сапатсыз жүргүзүүдөн улам, көп учурда иш сотто үзгүлтүккө учурап жатат деп айтты башкы прокурор Индира Жолдубаева Жогорку Кеңеште.
Бейшемби күнү Жолдубаева парламентке өлкөдөгү 2014-жылдагы мыйзамдуулуктун абалы жөнүндө отчёт бергени келди.
Анын айтымында, прокуратура органдарында квалификациялуу кадрлар жетишсиз.
"Криминалдашуу боюнча абал 0,5 пайызга кыскарды делгени менен, баары ошол тейден эле калып жатат. Мунун себеби, кесипкөй кызматкерлердин тартыштыгы, кээ бир учурларда прокуратура кызматкерлери өзүнүн жеке максаты үчүн кызмат абалынан пайдаланып кетишет", — деди Жолдубаева.
Анын айтымында, 2014-жылы соттор 361 адамды актаган. Анын ичинен 102 кылмыш иши "тергөө начар жүргүзүлгөндүктөн" улам жабылган. Жолдубаева көп учурда күбөлөр көрсөтмө берүүдөн баш тартып, же айыпталуучулар сотто акталып чыккан учурлар кезигип жаткандыгын айтты.
